Innlegging Vælkomin á Suðuroyar Sjúkrahús Her finna tygum hentar upplýsingar um tey praktisku viðurskiftini á Suðuroyar Sjúkrahúsi. Tá tygum koma á sjúkrahúsið, skulu tygum fara til ein av sjúkrarøktarfrøðingunum og fáa at vita, hvørjari stovu tygum koma at liggja á og hvat fer at henda fyrsta dagin, tygum eru á sjúkrahúsinum. Vit, ið starvast á Suðuroyar Sjúkrahúsi, gera okkara besta, fyri at tygum skulu kenna tygum væl, ta tíð tygum eru her og ynskja tygum góðan bata. Deildarleiðari er: Lisbet Jacobsen Persónligir upplýsingar Allir persónligir upplýsingar verða viðgjørdir undir skipaðum viðurskiftum sí hjálagda faldara um THS-skipanina. Telefon: Telefon, ið ringjast kann til, er á deildini. Egnar fartelefonir kunnu eisini nýtast á sjúkrahúsinum, tó ikki á stovu 1. Kanningar og viðgerðir: Flestu kanningar og viðgerðir eru fyrrapart, men sjúklingarnir verða bidnir um ikki at fara av deildini uttan at siga frá, tí onkur kanning ella viðgerð kann verða aðrar tíðir. Stovugongd: Læknarnir eru stovugongd hvønn fyrrapart. Klæðir: Meðan tygum eru innlagdur, fáa tygum undirklæðir og skjúrtur frá sjúkrahúsinum. Alt til persónligt reinføri skulu tygum hava við. Peningur o.t.: Sjúkrahúsið kann ikki átaka sær ábyrgd av peningi ella einstaklingaogn tygara. Máltíðir: Morgunmatur er kl. 08.00, døgurði er kl. 11.30 og nátturði er kl. 17.30. Eisini fæst kaffi og te seinnapart og um kvøldið. Sjónvarp: Sjónvarp er á flestu stovum og útvarp er á hvørjari stovu. Postur og dagbløð: Postur kemur hvønn fyrrapart á deildina. Sjúkrahúsið heldur føroysk bløð. Gudstænasta og møti: Møti er hvønn mánadag aftan á vitjanartíð og gudstænasta hvønn tórsdag aftaná vitjanartíð. Tubbak: Sjúkrahúsið er roykfrítt. Blómur: Tað er loyvt at hava avskornar og turkaðar blómur á sjúkrahúsinum. Skuldi okkurt verið, sum tygum ikki hava fingið greiði á, eru tygum vælkomin at spyrja starvsfólkini. |